Encontros coa protagonista

Poucas veces temos a ocasión de entrevistar ao protagonista do libro que lemos. Ese foi o privilexio que disfrutamos os participantes nas tertulias do Liceo o pasado día 26, despois de ter lido, e comentado, o libro Futuro Imperfecto, de Xulia Alonso.
Nesta emotiva “novela”, concebida inicialmente para a súa filla Lucía, a autora narra unha experiencia real, a historia de amor que viviu co seu marido, marcada primeiro pola adicción ás drogas e logo pola durísima experiencia da SIDA, que Nico, o outro protagonista, non conseguiu superar.

.

O pasado xoves, da man da autora-protagonista, conseguimos entender mellor ese proceso, que nos impresionara xa durante a lectura da obra, pero aínda máis ao poder coñecer persoalmente a esta muller. Menuda pero tremendamente aplomada, Xulia respondeu con precisión e honestidade, sen evadir ningún tema, ás preguntas dos alumnos, e aclarou moitos dos aspectos que nos intrigaron nas tertulias previas. Os alumnos e alumnas, pola súa banda, plantexaron cuestións intelixentes que deixaron ben claro ata que punto conseguiran, máis alá do que lles poidera gustar o libro, implicarse na lectura, analizar e valorar acertadamente tanto a novela como as experiencias vitais que agocha.

.

De feito, as profesoras xa quedaramos moi satisfeitas do desenvolvemento da tertulia, que tivo lugar o martes 24. Os alumnos e profesoras do Ferro Couselo compartimos a nosa experiencia lectora cos das Lagoas e os do Otero Pedraio. Partindo do libro, falamos de drogas, adiccións, relacións familiares, toma de decisións e, como non, de literatura. Houbo acordos, desacordos, visións similares e diferentes, comprensión e dúbidas sobre moitos aspectos da novela. Algunhas das nosas observacións foron confirmadas pola conferencia da autora, que tamén nos axudou a entender outros puntos que non acababamos de ver claros.

.

En resumidas contas, como soe pasar ao compartir lecturas, pero quizais con máis intensidade dado o carácter autobiográfico desta obra, conseguimos novamente ir ainda máis alá dela e recibir unha lección de vida. Porque detrás da literatura estamos nós, as persoas que damos vida aos libros compartindo a través deles as nosas vivencias, dándolles entre todos un significado que, moitas veces, vai moito máis alá do que está escrito.

.

Non vos perdades o vídeo (e os comentarios das profes) en O galego do quinto. Tamén podedes dar unha volta polos blogs dalgúns dos institutos que participan con nós nesta actividade: o IES Blanco Amor, o de Allariz, ou o Lagoa de Antela.